Fatawaa

سوال:برائے کرم اس آیت آمَنَ الرَّسُولُ بِمَا أُنْزِلَ إِلَيْهِ مِنْ رَبِّهِ وَالْمُؤْمِنُونَ كُلٌّ آمَنَ بِاللَّهِ وَمَلَائِكَتِهِ وَكُتُبِهِ وَرُسُلِهِ لَا نُفَرِّقُ بَيْنَ أَحَدٍ مِنْ رُسُلِهِ کی وضاحت فرمادیں ۔اس بات کا کیا مطلب ہے کہ ہم انبیاء کے درمیان کوئی تفریق نہیں کرتے اور رسول اللہ ﷺ کے بارے میں یہ آیت کیسے ہے؟

   الجواب باسم ملھم الصواب

     أحمدہ و اصلی علی رسولہ الکریم ،اما بعد:

’’ہم انبیاء کے درمیا ن کوئی تفریق نہیں کرتے ‘‘اس جملے کا مطلب یہ ہے کہ اس امت کے مومنین پچھلی امتوں کی طرح ایسا نہیں کریں گے کہ اللہ کے رسولوں میں باہمی تفرقہ ڈالیں کہ بعض نبیؑ کو مانیں اور بعض کو نبی ؑنہ مانیں جیسے یہودیوں کا حال تھا کہ حضرت موسیٰ   ؑ پر ایمان لائے لیکن حضرت عیسیٰ ؑ کو نہ مانا اور رسول اللہ ﷺ کی بعثت کا بھی انکار کیا اور نصاریٰ حضرت عیسیٰ ؑ پر ایمان لائے لیکن
حضرت موسیٰ  ؑ کو نہ مانا اور رسول اللہ ﷺ کی نبوت سے بھی انکار کیا ۔اس لئے مومنین کے لئے ضروری ہے کہ تمام انبیاء پر ایمان لائیں ۔
مزید یہ کہ سب سے پہلے پورا جملہ آپﷺکے ایمان کے ذکر میں لایا گیا اس کے بعد مومنین کے ایمان کا علیحدہ سے ذکر فرمایا اس میں اس بات کی طرف اشارہ ہے کہ اگرچہ نفس ایمان میں آپ ﷺاور تمام مسلمان شریک ہیں لیکن درجات ایمان کے اعتبار سے دونوں میں بڑا فرق ہے کہ جس طرح رسول اللہ ﷺکو اپنی وحی پر ایمان اور اعتقاد ہے اسی طرح عام مومنین کا بھی اعتقاد ہے لیکن درجات کے اعتبار سے فرق ہے کہ آپﷺ کا ایمان اکمل درجے کا ہے اور اس علم مشاہدہ اور سماع کی بناء پر ہے کہ آپ ﷺنے وحی کو اترتے ہوئے دیکھا ہےمعراج میں جنت اور جہنم کا مشاہدہ کیاہے ۔اس لئے آپﷺ کا ایمان سب سے زیادہ اکمل درجے کا ہے اور دوسرے مومنین کا ایمان ،ایمان بالغیب ہے اور ’’ آمَنَ الرَّسُولُ ‘‘میں آپﷺکا نام لینے کے بجائے لفظ ’’رسول‘‘ فرماکر آپﷺ کی تعظیم اور تشریف کو واضح کردیا ۔ آپﷺ کے ایمان کے ساتھ صحابہ کرامؓ کے ایمان کا تذکرہ فرمایا جس سے صحابہ ؓ کی شان میں مزید بلندی ہوگئی۔^([1])