جنرل  سیسی اور جامعہ ازہر
مولانا معراج محمد

جب سے جنرل عبد الفتاح سیسی مصر کی حکومت پر قابض ہوئے ہیں انہوں نے اسلام پسندوں پر گھیرا تنگ کردیا ہے۔ رابعہ عدویہ سمیت مختلف موقعوں پر ہزاروں اسلام پسندوں کو شہید کیا،مصر کی جیلیں اسلام پسندوں سے بھری پڑی ہیں جس میں اخوان کی اعلی قیادت سے لے کر ان کے حمایتیو تک جرم ضعیفی کی سزا بھگت رہے ہیں۔مگر سیسی نے اس پر بس نہیں کیا بلکہ اسلام کی اصلاح کی بھی ٹھان لی اور صدر بنتے ہی تعبیر دین کی تجدید پر زور دینا شروع کیا۔ انہوں نے دین کی جدید تعبیر جو مغرب کے لیے قابلِ قبول ہو،  کا کام جامعہ ازہر کے سامنے رکھا اور گزشتہ سال میلاد النبی کے موقع پر ایک مجلس میں شیخ الازہر اور علما ء کو مخاطب کرتے ہوئے کہا’’یہ کوئی معقول بات نہیں کہ جس فکر کو ہم صدیوں سے مقدس سمجھتے ہیں پوری امت کو سارے جہاں میں اضطراب ، خطرے ، قتل اور ہلاکت تک پہنچا دیں‘‘۔جامعہ ازہر نے اپنی عادت کے مطابق کوشش کی کہ فکری انداز سے مسئلے کا حل نکلے مگر حکومت کو یہ راس نہ آیا اور سیسی نے تجدید دین کا کام اپنے مشیر دینی امور ڈاکٹر اسامہ ازہری کے حوالے کردیا۔معاملہ اس وقت مزید بگڑ گیا جب طنطا اور اسکندریہ دھماکوں کے بعدسیسی نے دہشت گردی اور انتہا پسندی کے مقابلے کے لیے  ایک کمیٹی  کی تشکیل کا عندیہ دیتے ہوئے کہا ’’یہ کام اعلی سطح پر ہوگا اس کے لئے قانون سازی کی جائے گی تاکہ کمیٹی کو اپنے اہداف کے حصول کے لئے میڈیا ، عدالتی، قانونی ، دینی اور تمام اختیارات حاصل ہوجائیں‘‘۔ اس کے بعد تو گویا ایک طوفان امڈ آیا ،ہر طرف سے جامعہ ازہر پر الزامات کی بوچھاڑ شروع ہوگئی کہ دہشت گردی ،دین کی جدید تعبیر میں  ناکامی کا نتیجہ ہے۔ ازہر کے خلاف مزید شور تب برپا ہوا جب ازہر نے داعش کی تکفیر سے انکار کیا اور شیخ الازہرڈاکٹر محمد طیب نے سینیر صحافیوں سے ملاقات کے دوران کہا’’کہ ازہر داعش کی تکفیر نہیں کرے گا  کیونکہ ازہر اشعری مذہب پر چل رہا ہے جو کسی کو اس وقت تک کافر قرار نہیں دیتاجب تک وہ کلمہ پڑھتا ہے اور اہل قبلہ میں سے ہوتا ہے جبکہ وہ (داعش، گمراہی کا شکار ہونے کے باوجود)اہل قبلہ میں سے ہیں  اس لیے  ان کی تکفیر ممکن نہیں ‘‘ان کاکہناتھاکہ’’اس حوالے سے ازہر نے بڑی تنقید کا سامنا کیا مگر وہ اپنے مؤقف پر قائم ہے جس سے وہ کبھی نہیں ہٹے گا اور کسی کی اس وقت تک تکفیر نہیں کرے گاجب تک وہ صراحۃً اس چیز کا انکار نہ کرے جس نے اسے سلام میں داخل کیا ہے‘‘۔ انہوں نے ایک سوال کے جواب میں کہا کہ ’’اللہ کا انکار ہی ہے جو انسان کو ایمان سے نکالتا ہے اور ازہر کسی پرکفرکاحکم نہیں لگاتا بھلے وہ دنیا کی تمام برائیوں کا ارتکاب کرے اور داعش والے بہرحال مسلمان ہیں اگرچہ انہوں نے تمام جرائم کا ارتکاب کیا ہے چناں چہ ہم اُن پر فاسق اور فاجر کا حکم لگاتے ہیں لیکن ہمارے پاس انہیں کافر قرار دینے کا اختیار نہیں‘‘۔ایک موقع پر شیخ الازہر نے کہا ’’میں ان کی اس بات کو غلط سمجھتا ہو کہ وہ لوگوں کوکافر قرار دے کر قتل کرتے ہیں ۔اگر میں انہیں کافر کہوں تو میرے اور ان کے درمیان کیا فرق ہوا ؟ ‘‘