Fatawaa

سنن ابن ماجہ کے حوالے سے ایک حدیث موصول ہوئی ہے کہ موت کا اگر علاج ہوتا تو سنامکی میں ہوتا۔ اس کےبارے میں تحقیق بتادیجیے۔

سنن ابن ماجہ میں ہے: أَبَا أُبَيّ بْنَ أُمِّ حَرَامٍ...يَقُولُ «سَمِعْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ يَقُولُ عَلَيْكُمْ بِالسَّنَى وَالسَّنُّوتِ فَإِنَّ فِيهِمَا شِفَاءً مِنْ كُلِّ دَاءٍ إِلَّا السَّامَ قِيلَ يَا رَسُولَ اللَّهِ وَمَا السَّامُ قَالَ الْمَوْتُ»...قَالَ الْحَاكِمُ إِنَّهُ إِسْنَادٌ صَحِيحٌ. (حاشية السندي على سنن ابن ماجه، كتاب الطب، باب السنا والسنوت، 2/ 344) ترجمہ:’’حضرت ابو ابی ابن ام حرام رضی اللہ عنہ فرماتے ہیں کہ میں نے رسول اللہ ﷺ کو یہ فرماتے ہوئے سنا کہ تم سنامکی اور شہد کو لازم پکڑو، کیونکہ ان میں سام کے علاوہ ہر بیماری سے شفا ہے۔ عرض کیا گیا کہ اے اللہ کے رسول سام کیا ہے؟ آپ ﷺ نے فرمایا: موت‘‘۔

اس حدیث کی تحقیق میں علامہ نور الدین سندھی رحمہ اللہ نے امام حاکم رحمہ اللہ سے نقل کیا ہے کہ اس حدیث کی سند صحیح ہے، اور اس صحت پر اعتماد کیا ہے، البتہ علامہ ذہبی رحمہ اللہ نے اس سند پر کچھ کلام فرمایا ہے، لیکن چونکہ اس حدیث کے دیگر متابعات اور شواہد بھی موجود ہیں، لہذا ان کی وجہ سے یہ حدیث صحت کے درجے میں پہنچ جاتی ہے۔

البتہ ہر شخص کے لیے اس کے استعمال سے پہلے مناسب ہے کہ اپنے مزاج و عمر کے مطابق اس کی مقدار اور طریقہ استعمال کے بارے میں کسی حاذق طبیب سے مشورہ لے کر اسی پر عمل کرے تاکہ کسی نقصان سے محفوظ رہ سکیں۔

فتوی نمبر: 4420