Fatawaa

سوال نمبر 1:برائے کرم یہ بتائیں کہ اگر طلاق زبردستی دلوائی جائے یعنی مرد طلاق نہ دینا چاہتا ہو لیکن لڑکی کے خاندان والے اُسے دھمکیاں دیں اور اپنی زندگی بچانے کے لئے وہ طلاق کے کاغذات پر دستخط کردے تو کیا ایسی طلاق اسلام میں جائز ہوگی؟

سوال نمبر 2:کورٹ کی طرف سے خلع کی کیا حیثیت ہے ۔کیا یہ اسلام میں قابل قبول ہوگی؟

   الجواب باسم ملھم الصواب

     أحمدہ و اصلی علی رسولہ الکریم ،اما بعد:

جواب نمبر 1:اگر جبر و اکراہ کر کے طلاق تحریر کرادی جائے اور زبان سے طلاق کے الفاظ ادا نہ کئے جائیں تو شرعاً ایسی تحریر سے طلاق واقع نہیں ہوگی ۔البتہ اگر زبان سے بھی طلاق کے الفاظ کہہ دیے توشرعا ً اس سے طلاق واقع ہوجائے گی۔^([1])

جواب نمبر 2:واضح رہے کہ خلع بھی مالی معاملات کی طرح ایک معاملہ ہے جس میں فریقین کی باہمی رضامندی ضروری ہے ۔اس لئے کسی ایک فریق کی رضا مندی کے بغیر خلع کا وقوع نہیں ہوتا۔لہذا عدالت کا شوہر کی عدم موجودگی کی صورت میں یک طرفہ خلع کی ڈگری جاری کرنا علیحدگی کے لئے کافی نہیں ہے بلکہ اگر عدالت نے شوہر کو بلایا اور شوہر نے اپنی رضامندی ظاہر کردی تو خلع ہوجائے گی۔^([2])

واللہ اعلم بالصواب